
JOJ Dakar 2026 : Gollotooɓe kisal 15 000 e volontaarɓe 6 000 mobilisaama ngam Fijirɗe Olimpik Sukaabe
E sahaa nde ñalɗi jeegom tan heddii ngam udditgol Jeux olympiques de la jeunesse (JOJ) Dakar 2026, ngal heblaama ñalawma 31 octobre, koordinaator Comité d'organisation (COJOJ), Ibrahima Wade, hollii heblaaji sakkitiiɗi ɗi mbaɗaa. E sahaa nde o noddaa e émission « Point de vue » e RTS, o laaɓtinii feereji gollotooɓe, kisal e logistiki ɗi mobilisaama ngam jaɓɓaade ndee sirla Olimpik mawnde, nde wonata arannde e kontinaa Afrik.
Heblaaji mawɗi ngam kisal e logistiki
E ko Ibrahima Wade humpitiri, ɓadii gollotooɓe kisal e soldaarɓe 15 000 maa mobilisee ngam reenude atleetɓe, delegasioŋaji e yimɓe ɓe ngartata ƴeewtaade konkuruji.
JOJ Dakar 2026 maa jaɓɓo ɓadii atleetɓe 2 700 iwɓe e comités nationaux olympiques 206, wondude e offisiyelɓe teknik 1 800.
E kuuɓal, ɓadii yimɓe 29 000 ena tijjanee heɓde akreditasioŋ, tawa hakkunde 12 000 e 13 000 maa ngaru e leydiiji janane.
Heblaaji ɗii renndini kadi gollotooɓe COJOJ 800, consultants 200, agents publics ɓurɓe 300 e gollotooɓe prestataires 10 500.
Volontaarɓe 6 000 ngam wallude JOJ
Koordinaator oo yettii tiiɗnugol volontaarɓe 6 000 ɓe cuɓaa tee ɓe jannginaama ngam wallude delegasioŋaji e hollude yahduɓe nokkuuje ɗi ɓe ɗaɓɓata.
Ɓe maa ngollo e fannuuji jaɓɓorgol, hoɗdugol, transport e ballal e nokkuuje konkuruji.
ONCAV naatii kadi e heblaaji ɗii e volontaarɓe 500.
Udditgol JOJ maa renndin dansoɓe 650
Sirla udditgol JOJ heblaama waɗeede 31 octobre 2026 e stade Abdoulaye-Wade e Diamniadio.
Ndee sirla maa renndin ɓadii dansoɓe e chorégraphes 650, ngam hollude finaa-tawaa Senegaal e Afrik.
Ƴeewtagol sakkitiingol sirla ndee heblaama 29 octobre.
Billets milioŋ gooto heblaama ngam yimɓe
COJOJ anndinii wonde ɓadii billets milioŋ gooto heblaama ngam konkuruji sport ceertuɗi.
Coggu billets ngam fijirɗe sport ko 400, 500 e 1 000 FCFA.
Ngam sirla udditgol, coggu billets ena fuɗɗoo e 4 000 FCFA, tawa woɓɓe kategoriiji ko 15 000 e 40 000 FCFA, walla ɓurɗum.
E miijo Ibrahima Wade, moƴƴere JOJ Dakar 2026 maa faw e renndugol semmbe e tiiɗnugol Senegaalɓe. Gila 31 octobre haa 13 novembre 2026, Senegaal maa jaɓɓo Fijirɗe Olimpik Sukaabe aranɗe ɗe mbaɗetee e kontinaa Afrik.
Fouta TV - L'information au service des citoyens.






