
Jaaygol drogue : Ɓadii kilo 11 e cocaïne nangaama hakkunde Sangalkam e Guédiawaye
Gendarmerie nationale humpitii nangugol kilo 10,868 e cocaïne e nder operasioŋaji ɗiɗi ɗi waɗaa e Sangalkam e Guédiawaye, hakkunde 7 e 12 novembre 2026. Yimɓe ɗiɗo nangaama e ndee haala, tee kuutorɗe ɗe huutortee ngam heblaade e renndinde drogue keɓaama kadi.
Nangugol aranol e RN8
E ko communiqué Gendarmerie nationale holli, gendarmes brigade Sangalkam nangii neɗɗo gooto jemma hakkunde 7 e 8 novembre, e laawol leydi nomba 8 (RN8).
E ndee operasioŋ, gendarmes tawii kilo 1,725 e cocaïne e juuɗe mo nangaama oo.
Caggal ɗum, ƴeewtagol ngal hokkitaama Groupement de lutte anti-drogue (GLAD), ngam jokkude ƴeewtagol ɗo ndee drogue iwri e anndude yimɓe ɓe nde ɗaminaa yahde to maɓɓe.
Ɓurɗe kilo 9 keɓaama kadi e Guédiawaye
Ƴeewtagol ngal yahdinii ƴeewtooɓe haa e neɗɗo mo ena sikkitaa wonde ko kanko hokkata drogue, mo hoɗi e Guédiawaye.
Operasioŋ ngal waɗaa ñalawma 12 novembre e suudu mum addii nangugol kilo 9,143 e cocaïne, wondude e balansaaji e kuutorɗe heblaade e paketeede drogue.
E miijo ƴeewtooɓe, ɗee kuutorɗe ena mbaawi hollude wonde golle heblaade e siirtinde drogue ena sikkitaa waɗetee e laawol peewngol.
E fof, kilo 10,868 e cocaïne nangaama e nder operasioŋaji ɗiɗi ɗii.
Ƴeewtagol ngal ena jokkude ngam anndude yaajde jokkondiral jaaygol drogue ngal ena sikkitaa woodi, e yiytude yimɓe goɗɓe ɓe mbaawi jeyde e ndee haala.
Fouta TV - L'information au service des citoyens.





