
Conseil des ministres 18 novembre : Diomaye Faye hollii faandaaji JOJ, emigrasioŋ e porojeeji mawɗi
President Bassirou Diomaye Faye ɗowii Conseil des ministres ñalawma alarba 18 novembre 2026, e Palais de la République. Reende ndonu Jeux olympiques de la jeunesse (JOJ), haɓde e emigrasioŋ e laawol yamiraangol, heɓnude sukaaɓe golle e rewindo porojeeji mawɗi infrastruktuurji wonii e hakkunde haalaaji ɗi jeewtaa.
JOJ Dakar 2026 : Conseil présidentiel humpitinaama
Caggal nde o yetti no Joowe olimpik araniiɗe e Afrik waɗiri, president oo humpitii waɗeede cérémonie teddinde atletɓe Senegaal ɓe keɓi medaay e yimɓe ɓe walli e eɓɓaade Joowe, ñalawma 20 novembre.
O yamirii kadi Premier ministre ngam o heblu Conseil présidentiel hade hitaande timmude, ngam ƴeewtude bilan JOJ e semmbinde ko ɗe addi.
Laamu ena eɓɓa porogaraam « JOJ Impact-Héritage », ngam huutoraade infrastruktuurji, ganndal e gollondiral ngal heɓaa e sahaa Joowe. Hakkille keeriiɗo maa waɗe e dow heɓnude volontaireɓe golle.
Emigrasioŋ e laawol yamiraangol : ɗaɓɓugol feereji jaawɗi
Caggal luggugol laana e Lompoul, ngal addi maayɓe, Bassirou Diomaye Faye noddii semmbinde rewindo tefere maayo e nanondiral hakkunde sarwiisiji ɗi haɓata e yahdu emigrasioŋ e laawol yamiraangol.
Ministre de l'Intérieur maa hokka rapport e dow ndee haala, tawa Premier ministre yamiraama ngam o eɓɓu porogaraam keeriiɗo ngam heɓnude sukaaɓe golle e wallude entreprenariat maɓɓe.
Infrastruktuurji e événements nasional
Conseil oo ƴeewtii kadi no golle port multifonctions Ndayane e Réseau gazier du Sénégal njahrata, tawa hakkille waɗaama e dow finans e sahaa timmingol porojeeji ɗii.
President oo tabitinii udditgol Biennale de l'art africain contemporain ñalawma 19 novembre, njahdu ekonomi e Tambacounda e Kédougou gila 26 haa 29 novembre, e udditgol usine laɓɓingol ndiyam maayo ngam heɓde ndiyam njaram e Mamelles ñalawma 3 décembre.
Laamu jeewtii kadi heblaade siftorgol massacre de Thiaroye, mo eɓɓaa ñalawma 1er décembre, tee o jaɓii projet de loi ngam yamirde ratification Charte africaine révisée du transport maritime.
Fouta TV - L'information au service des citoyens.




